Irutxuloko Hitza

Astelehenean itxiko dute Etxadi kirol gunea, berritze lanak egiteko

Aiete

Udalak kirol instalazio berrituak kudeatzeko lehiaketa publikora 2009an deituko du.

raul perez

Astelehenean itxiko dute Etxadi kirol gunea. Gutxienez, urte eta erdi egongo da itxita, barrualdea guztiz berrituko dutelako. Orain arte Etxadi Kirol Elkarteak kudeatu du kirol gunea, eta hain zuzen ere 31n bertan bukatzen da Kirolaren Udal Patronatuaren eta Etxadi kirol elkartearen arteko hitzarmena. Etxadik bi asteko epea izango du kirol gunea husteko, makinak barrualdera sartu aurretik. Obrek irauten duten bitartean, Etxadik behin-behineko egoitza izango du Katalina Eleizegi kalean, Etxaditik gertu. Ziurrenik datorren astean bertan onartuko du Gobernu Batzordeak Etxadiri lokala ematea. Etxadiko mahai-tenis taldeak Josean Gasca kiroldegira lekuz aldatu beharko du eta padel eskolak Intxaurrondon emango dituzte. Lehiaketa, orain ez

Obrak egin eta gero, kirol gunea zeinek kudeatuko duen erabaki beharko du Udalak. Lanak azken txanpan egon arte ez dute lehiaketa deituko. Hau da, 2009an bertan egingo dute lehiaketa. Kiroletako Udal Patronatua lehiaketa berehala egitearen aldekoa zen, baina Udaleko kontratazio mahaiak 2009an egitea erabaki du, une honetan zerbitzuen prezioak eta abar ez daudelako zehaztuta.

Berritze lanak

Etxadiko barrualdea guztiz eraldatuko dute. Igerilekuetako eta tenis pistetako batzuk estali egingo dituzte ,eta hainbat erabileretarako eraikina eta taberna jarriko dituzte.